చిత్రసీమలో ఒక్కొక్కరి ప్రయాణం ఒక్కో రకమైన పాఠాన్ని నేర్పుతుంది. కొందరు నటనతో కోట్లు సంపాదిస్తే, మరికొందరు అనుకోకుండా చేసిన పెట్టుబడులతో అనూహ్యమైన సంపదను సృష్టిస్తారు. బాలీవుడ్ ప్రముఖ సీనియర్ నటుడు జీతేంద్ర జీవితంలో జరిగిన ఒక ఆసక్తికరమైన నిజమైన సంఘటన ప్రతి ఒక్కరినీ ఆశ్చర్యానికి గురిచేస్తుంది. ఒకప్పుడు కేవలం రూ.4.25 లక్షలకు కొనుగోలు చేసి, ఫ్లాప్ సినిమాల భయంతో "దురదృష్టకరమైన ఇల్లు" అని భావించి వదిలేసిన ఒక బంగ్లా.. కాలక్రమేణా రూ.450 కోట్లకు పైగా విలువైన మహా సామ్రాజ్యంగా మారడం సినీ వర్గాల్లో తీవ్ర చర్చనీయాంశంగా మారింది. రియల్ ఎస్టేట్ రంగానికి సంబంధించిన ఈ ఆశ్చర్యకరమైన ప్రయాణం వెనుక ఒక ఆసక్తికరమైన గతం, లెక్కలు దాగి ఉన్నాయి.

జీతేంద్ర తొలినాళ్లలో చాలా సాధారణ దిగువ మధ్యతరగతి కుటుంబం నుంచి వచ్చారు. ముంబైలోని గిర్గామ్‌లోని ఒక చిన్న చాళ్‌లోని 20x10 అడుగుల చిన్న గదిలో ఏకంగా 8 మంది కుటుంబ సభ్యులతో కలిసి ఎంతో ఇబ్బందుల మధ్య నివసించేవారు. అలా పేదరికంలో గడిపిన ఆయనకు సొంతంగా ఒక పెద్ద బంగ్లా కొనడం అనేది ఒక నెరవేరని కలలా ఉండేది. అయితే 'బైజూ బావ్రా' వంటి క్లాసిక్ చిత్రాలతో అప్పట్లో స్టార్ డమ్ అనుభవించిన ప్రముఖ నటుడు భారత్ భూషణ్ తీవ్ర ఆర్థిక సంక్షోభంలో కూరుకుపోయారు. ఆ సమయంలో ఆయన ముంబైలోని అత్యంత ఖరీదైన పాలి హిల్ (Pali Hill) ప్రాంతంలో ఉన్న తన విశాలమైన బంగ్లాను విక్రయించాలని నిర్ణయించుకున్నారు. ఆ ప్రతిపాదన జీతేంద్ర ముందుకు రాగా, తండ్రి సలహాతో 3,450 చదరపు అడుగుల స్థలంతో కూడిన ఆ బంగ్లాను కేవలం రూ. 4.25 లక్షల రూపాయలకు జీతేంద్ర కొనుగోలు చేశారు.

అంత చిన్న చాళ్ గది నుంచి ఒక్కసారిగా పాలి హిల్‌లోని లగ్జరీ బంగ్లాలోకి మారిన జీతేంద్ర కుటుంబంలో ఆనందం ఎక్కువ కాలం నిలవలేదు. ఆ ఇంట్లోకి మారిన వెంటనే జీతేంద్ర నటించిన 4 సినిమాలు బాక్సాఫీస్ వద్ద ఘోరంగా ఫ్లాప్ అయ్యాయి. దానికితోడు ఆ ఇల్లు అమ్మిన భారత్ భూషణ్ కూడా ఆర్థికంగా తీవ్రంగా నష్టపోవడంతో, ఈ బంగ్లాకు ఏదో నెగటివ్ సెంటిమెంట్ ఉందనే భయం జీతేంద్ర మనస్సులో బలంగా నాటుకుపోయింది. ఈ ఇల్లు తమకు దురదృష్టాన్ని తీసుకొస్తోందని, ఇక్కడే ఉంటే తమ కెరీర్ నాశనమైపోతుందని భావించిన జీతేంద్ర, తన తండ్రితో కలిసి వెంటనే ఆ బంగ్లాను ఖాళీ చేసి వేరే ప్రాంతానికి మారిపోయారు.

అయితే కాలం ఎల్లప్పుడూ ఒకేలా ఉండదు. కొన్నేళ్ల తర్వాత ఒక రియల్ ఎస్టేట్ బిల్డర్ జీతేంద్రను కలిసి ఆ బంగ్లా ఉన్న స్థలంలో రీడెవలప్‌మెంట్ ప్రాజెక్ట్ చేపడదామని ప్రతిపాదించారు. దానికి జీతేంద్ర వెంటనే అంగీకరించారు. పాత బంగ్లాను కూల్చివేసే సమయంలో జీతేంద్రకు ఒక ఊహించని షాక్ తగిలింది. ఆ భవన నిర్మాణంలో ఉపయోగించిన విలువైన బర్మా టేకు (Burma Teak) కలపను అమ్మడం ద్వారానే ఆయనకు ఏకంగా రూ. 11.5 లక్షల ఆదాయం వచ్చింది. అంటే ఆయన మొత్తం బంగ్లాను స్థలంతో సహా రూ. 4.25 లక్షలకు కొంటే, కేవలం పాత ఇంటి కలప అమ్మకంతోనే కొనుగోలు ధర కంటే దాదాపు మూడు రెట్లు ఎక్కువ నగదు దక్కింది.

ఆ తర్వాత ఆ స్థలంలో 'గౌతమ్ అపార్ట్‌మెంట్స్' (Gautam Apartments) పేరిట 82 రెండు పడకల గదుల (2BHK) అపార్ట్‌మెంట్ కాంప్లెక్స్‌ను నిర్మించారు. అప్పట్లో త్వరితగతిన విక్రయించాలనే ఆత్రుత‌లో జీతేంద్ర చదరపు అడుగును కేవలం రూ. 85 చొప్పున విక్రయించారు. కానీ నేడు అదే పాలి హిల్ ప్రాంతంలో చదరపు అడుగు ధర రూ. 85,000 వరకు చేరిందని ఆయన కుమారుడు, నటుడు తుషార్ కపూర్ ఇటీవల వెల్లడించారు. అంతేకాకుండా, ప్రస్తుతం ఆ అపార్ట్‌మెంట్ ఉన్న భూమి విలువ మాత్రమే దాదాపు రూ. 450 కోట్లు దాటిందని, మొత్తం ప్రాజెక్ట్ విలువ రూ. 500 కోట్లకు చేరుకుందని జీతేంద్ర స్వయంగా తెలిపారు. ఒకప్పుడు దురదృష్టమని భయపడి వదిలేసిన ఆస్తి, నేడు వారి కుటుంబానికి వందల కోట్ల లాభాన్ని తెచ్చిపెట్టింది.